زجل مغربي : بنت العافية الزاهية اللي شافت المر..

الشاعرة المغربية الأندلسية نادية بوشلوش عمران

بنت العافية الزاهية اللي شافت المر..

نهز القلام
ما نحط علام
ندوي و نگول
و قلبي حامل السلام
سلاهمي كبير تطفي اللوم
تزيد يضوي في الأحلام
ندوي و نگول
أنا بنت السمق و اللوحة المحفوظة
بنت الشوك اللي تنقي الدود
بنت الأرض لي تتنبت شجر
خضر ما يابس زوين
،شوفة فيه تنسي الحگور
بنت الجبل العالي لي تصبر
بنت الريح و البرگ الحر
انا بنت النجوم السارحة بالليل
بنت الگمرة المضوية الظلام
الساحرة اللي تتشرگ الغموم
بنت البحر لي ما راضي بهموم
بنت الموجة اللي ما حاملة وسخ
ينت الورد و النوار لي معطر المكان
بنت الجلابة و القفطان للي كان زمان
بنت الكلام لي تكسر الحجر
بنت السكات اللي تقسم الظهر
بنت اللوحة و الطباشير
بنت اليد الفلاح لي زرع الكمح
و الشعير و الخرطال
بنت الشعب اللي ماعندوا زهر
بنت الجامع اللي تعيط بالفجر
بنت العافية الزاهية اللي شافت المر
بنت الكانون و الجمر الحارگ اللي في الحلقومة تنطح
بنت القنديل بزيتوا اللي بالنور تسطع .