شعر ( بالمحكية العربية) ذبانة على قرن التُّور

مصطفى الزِّيــن

( إلى روح أمي..؛

روحها الشاعرة.. السابحة في ملكوته )

اعْلى قرن التُّورْ..

-كل ثور- ديما عاشت ذبَّانَه

خلينا من الدبان لاخور الكثير الغزير :

اللي لاصق فجلْدُو

قْرادْ يعض ويهبر

واللي ينغل من تحت لبطانه يرشِّي

..يحفرْ.. لا، ..هذي وحدة تانيه..

ذبانه فريده حميده

نگولو مزيونه مزيانه

دبَّانه ..رومانسيَّه ..

مخلط زنزانها..

وطنيه ..قوميه..

تتنقل ..وتجيه مرة على گرن اليمين

ومرة عسرية يساريَّه

من الجهه لْهِـيهْ كانت ديما تغني ليه

على العجلة لغزالة اللي كان يبغيها

و كانت تبغيه ومخاصمها

ومخاصماتو مين الحساد والوساوس داخلتها وداخلاتو

ساكنتها و سكانتو

وسرقها منو التور لبيض

ودابا .. دابا ..يرجع ليها

-الحبيبه- “الثورة” الحمرا..

بنت الثور

ودابا ..دابا ..ترجع تاني ليه

وكانت ديما تخرّْج تنْضمْ من روحو .

.ووجدانو معاني غناوي

ساكنة مكلكة

مگجگجة بين كرونو

تدمدم كلامو ولحانو وأحزانو وشجانو

اللي توحدو مع الثيران گرانو

وعلى نهار العيد لكبير

نهار يجليو الذبان لاخور

اللي واكل من لحمهم وشارب من دمهوم

يوم يرميو خشبة النير من فوق رقابيهوم

اللي بالدم دابراهوم ومطيرا النعاس من عينيهوم

يوم يتحرر جمهور القطيع وتصير .

.تسير ورا الزعيم لعضيم ..

الثور لجنَّةْ مْراجي الخُضره والنضره والنورْ وجا

..جا العيد لكبيرْ فرحة كبيره..

ويا فرحة ما دامت ..

ودبحو شلا منك يا بگرا

وشلا منك يا يا عجل وعجله

وشلا منك يا تور وصار الزعيم التور

ياكل لحومات يشرب دمايات خوتو حمرا خضرا

ويصدر منها لقومان التور لبيض ورا لبحور ورا جزر واك واكْ..

ورا جبل الطور كانت الدبانه الشيخه ..

الغنَّايه..

مگاجية فنانه تغني ليه..

تهمزو.. تحفزو..

تهزو يحرث يجر يدفع دورْ ..

دو /ري/ مي/ فا /صو /لا صو …

دورْ دور ياتورْ بالرحى مع الرحى

اصبر وخا تاكل من التبن المعفّْنْ

وتشرب مويهَه عكريه مالحه

على نغام الشيخ إمام ناح النواح والنواحا على بگرة حاحا النطاحا..

وينعس الرفيق الثورْ مقسح..

مسفح..

مدبور مقتول بارد

مكفّْنْ على نغامات ياك أجرحي جريت وجاريت

واحلامات وعذابات روميو وجوليت

وكانت الدبانة تُورِيَّه الفنَّانَه الفتَّانَه بكري..

فجر، تنوض تصحيه نوض تور ..

نوض تور يا تور ..

أفق..

فيق ..

يارفيق..

تور..تور

ولات دبانه طيكوك تغني ليه على هشيمين وبانكوك

لا صقة فيه فطيزو تنخزو..

تهمزو.. تحفزو.. تهزو..

هازه منجل ومطرقة خزيت..

خيزو..

وما مشى تا جهل ..

تهز..

تورنا معيزو وشعلت نار شعلالة بين گرونو ولى سايگ كاميون بلا فرانات عقلين عليه:

فورد ..

بيد فورد ..

ڤولڤو..

رونو دهس خوتو وجرح روحو تهرسو ليه گرونو ونزل..

وهزل التور ولات عظام وركيه قرابص

دربوزو وما بغات دبانة طيكوك الفنانه الفتانه تفارقو

بقات لاصقة ليه فطيزو مرة مرة..

تنخزو تهمزو تهزو ..

وما يلقى تورنا غي البگرا مسكينه يركل فيها وتركل..

تفركل ،تا هي فيه

وعادت تاني ديك الدبانه للعجل

ولد نفس التور الدبانة الفنانه هذ المرة إلكترونيه

سمارت موش تبغي تدخلو تخرجو للحوش

تهمزو تهزو مهل بالويفي والريزو

دخلت لودنيه كيتمان وعجلنا ،مزيناتو..

بهلْ معيزو..

فرطاسْ مدابز مع الكاغيط القرطاس تشوفو غادي يڤبري..

ينقز..

يتهز بفرايقشاتو

يلعب يفز جالب شلا جلبات ومگلوب

شلا گلابات وبحال والو تا هو يطيح كاو سمارت كاو

منسجم مع ذبانتو أنطيگري كاسطري يتلاوط..

يتلاوح فمواج..

تتلاطم تعواج ويحلف فحوش باه لا بات وهاديك..

مسكينة الدبانه الفنانه اللي كانت حاضيه لبحار لا يرحل

ماتت -الله يرحمها- موته مزيانه

من بعد ما كانت عيطه ولات عويطه فمريكان سمارت موش

ذبانه سريعة زِينَه فنه فنانه.

صفرو- الخميس 10 يونيو 2021 .